دیسان ڕاوەخەو
ئیسماعیل خالید گەڵاڵی/ شاعیر/ ھەولێر
ئێوارەیەک
بە شەمەندەفەرێکی تیژڕۆ
دێمە شارۆچکەکەتان،
لە دوا واگۆنی دادەبەزم و
دوو تابلۆ لە جانتا شڕەکەم دەردێنم و
بە لادیواری
هۆڵە خنجیلانەکەی چاوەڕوانیدا
هەڵیاندەواسم.
خێرا…
سوواردەبمەوەو،
بە یەکجاری
سەرهەڵدەگرم
*
شەمەندەفەر تەمەن و
شارۆچکە تۆو
هۆڵە جوانەکە دڵت و
دوو تابلۆش…
چاوانی من
___________
دەمودەست
دوای لە خەو ڕاچەنین
