با دەتبا
رزگار کاوانی/ شاعير / هەولێر
رۆژێک دێت؛
وەک ددانێکی ڕزیو فڕێت دەدەن.
وەک گەماڵێک تێتهەڵدەدەن.
کەوێکی پیریت و
حەز ناکەن قاسپە قاسپەی دوێنێت ببیستن
تێتدەگەیەنن؛
ئیتر تۆ بەکەڵکی ڕاوکردنیش نەماویت..
وەک جلی مردوو دەبەخشرێیت
وەک کۆڵکە دارێکی پایزە دەسوتێنرێیت.
ئینجانەیەکی کۆنیت و
بەدەستی گوڵەکان دەشکێنرێت
دەبیتە مستێک خۆڵ و
لەگەڵ نیشتیماندا دەفرۆشرێیت..
دەچیتە ناو قەدی کتێبێکی مێژوو و
ناخوێندرێیتەوە.
چیرۆکێکیت و نانوسرێیتەوە
تابڵۆێکی دانسقەش بیت
لەناو ڕەنگی ناشیرینیەکاندا نادۆزرێتەوە
وەک دەستنووسێکی پەڕپەڕکراو
بێ ژێدەر و ژمارە و ناو.
ڕەشەبا
بۆ دوورترین شوێن
دەتبا..!
با دەتبا
دەتبا…با.
ڕزگارکاوانی
2025
