ئەو سەردەمە کوا؟!

کاسەی سەرمان سیخناخ بووە لەو ئەهریمەنانەی

بە ماسکی فریشتەوە خەیاڵە جوانەکانمان لە سێدارە دەدەن

زەفەر بە ژیان و ئەوین و خۆشەویستیمان دەبەن و

ئاڵۆزی ڕێگای ڕق و کینەی دەکەن..

بۆییەی سپی لە تاریکایی دەهەسوون

بە ڕووناکی پێمان دەفرۆشنەوە

نقورچ لە خۆشبەختیمان دەهاژن و

لە نێوەڕاستی خەونی خۆشدا بێدارمان دەکەنەوە..

چاویلکەی ڕەشبینی لەچاوە جوانبینەکان دەئاخنن

تابلۆکان بە ناشیرینی دەگۆڕنەوە

سەما بە شین سەودادەکەن

زانست بە خەیاڵ لێکدەدەنەوە

دژی ماچ و شیعر و بادەن

هیوا کوژی

ژەهر ڕژی

خوێنمژی…

ئەوانەن کە هەرچی جوانی و ئارامی لەناویدا دەژی..

تۆ وەرە و وەک پێنوسی سپی بەر دەستی شاعیرێکی عاشق

گڕێ کۆرە ڕەشەکانی ناو کاسەی سەرت بکەرەوە

ئەهریمەنەکانی ناو خەیاڵدانت ئازاد بکە و

ئەو گڕەوە لەو تاریکییە ببەرەوە.

ڕۆژەکانی کۆتایی ساڵی ٢٠٢٤

کاوانیان