تێکست
رەحیم لوقمانی/ شاعير / سەقز
هەرچی بانگی منارەیەک ئەدا لە گوێم
هاواری سووری باوکم و فوارەی سینگی براکەم و
قیژەی پەلکەی کێش کراو و
سینگ و مەمکی دادڕاوی دایک و خوشکم بیر دێتەوە
ئەمە ترۆمای کچێکی ئێزدییە
هەرچی باسی سوورەی سووری ئەنفال دەکەن
بە خەنجەری ئەم وشانە، زامەکانم دەکولێنەوە
چون خنکانی هەزاران گوند و کانیم و
مەرگە کۆچی ئازیزانم بیر دێنەوە
ئەمە ترۆمای جێماوی کۆچ و ئەنفالە
خۆزگا مێشکی هاوسێکانم،
فکر و سۆزیان بەڕۆژ بوایە و
لە فەرهەنگی پرتووکاویان،
وشەی زیندان و ئێعدامیان لا دەبردن
ئاخر هەموو ئەو فکرانە، ستانداردی وەحشیگەرین
گشت ترۆما و سەختەزامی کۆن و تازەی ئێمەی کوردن
(نەکەرۆز)
(ترۆما (Trauma) : زامی دەرەکی یان شکستێک لەسەر جەستە، تەجروبەی تاڵ لە ژیاندا، پەرێشانیی دەروونیی، پاش کارەساتێکی ناخۆش.)
