پیرەژنێک… !

پیرەژنێک سەگەکەی لە باوەش گرتووە

ئێرە چەند لە ئەمەریکا دەچێت؟ چەند لە ئەستێرەیەکی دوور دووری نەبینراو دەچێت

دەنگێک دەپرسێت، دەزانی؟

ئەم پیرەژنە بەیانی دەبێتە ٩٢ ساڵ و

ملیۆنان ساڵی بەسەر چووشی بیر دێتەوە

هاوڕێیەکی میهرەبانە و..

چارەسەری شێرپەنجەی سەگەکەی دەکات

ئێرە ئەمەریکایە، یان بەهەشتێکی بێ مرۆڤ

پیرەژنێک ترس دای دەگرێت

دوای دە هەزار ساڵ

ڕۆبۆتێک لەئاسمانەوە دێت و بێ زمان و بێ پرس و سڵاو

دەپرسێت ئێرە ئەمەریکایە؟

ئەی تۆپیووی بۆگەن و توو مەرگی سەگە میهرەبانەکەت

ئێرە ئەمەریکایە؟

سەد، بڵێ هەزار، نا .. نا ملیۆنان شتی سەیر دێنە خوارەوە

پیرەژن دەپرسێت و دەترسێت

خوایە، من تۆم خۆشەویست

من تۆم پەرست و کۆیلەی شەو و ڕۆژت بووم

ئەمانە تۆ دەناسن؟

ئەمانە تۆ دەپەرستن، وەکو ئەزی کۆیلە و بەندەت

خودایە ، ئەمانە نوێژ دەکەن

ئەوانە لەوێ لە ترسەوە هاتوون

ئەی خودایە، لەوێ مردن هەیە؟

من ملیۆن ساڵە دەتپەرستم و کۆیلەی لەسەر چۆکانی تۆم

ئەوانە، ئەم جەستە سەیر و ئاسنین و ئامێرانە

تۆ دەناسن

تۆ دەپەرستن

تۆیان بیر دێتەوە…؟