باڕۆڤەیەک لە سەرمدا گڤەی دێ
نوری بێخاڵی/ شاعیر/ ڕواندز
هیچ جێیەک وەک خۆی نەماوە
نە ماڵ
نە مەکتەب
نە مزگەوت
نە مینبەر و
نە مەقەڕ
جاران سێ ڕۆژ پرسە و
هەفتەیەک زەماوەند بوو
ئێستا سەعاتێک ئاهەنگ و
سەدەیەک گریانی بێ دەنگ
کەوتنەکانمان هێندە زۆرن
هەر ئەوەی نەهێڵین پێستی شوێنێکی ترمان بڕووشێت،
چش لە هەڵسانەوە
ئاشووبێک ڕادەستی ئافاتێکمان دەکات
بەڵایەک بە وەیشوومەیەکمان دەسپێرێت
کۆستێک دەمانداتەوە دەستی کارەساتێک
خەمێک دەمانباتەوە سەر کانیی خوێنێک
گورگی برسیی شەڕ کەوتۆتە گیانمان
داڵی بێدادی چاومان هەڵدەکۆڵێت
دەمی هار و
کەڵبەی دژوار، دەمانهاڕن
گوللە نەما، دڵی دیوار و دیوانەکانمان نەبێژێت
برین نەما، کێم نەخاتە یادەوەری و ئاگاییمان
سووتان نەما، خەونمان نەکاتە قەرەبرووت
درەخت نەما، بۆمان نەبن بە دارەباز و بە تابووت
بەم هەموو مەینەتییەوە،
چۆن حەیران بەم چیایانەدا هەڵزنێ و
کەی لاوک پیاسەیەک بەم دەشتانەدا بکاتەوە؟
ن
ە
م
ا
ن
هیچیان
ن
ە
م
ا
ن
سۆزی بزە
گەرمیی سڵاو
شیرینیی قسە
نەرمیی باوەش و
ماچی گەییوی هەنگوینیی
چ
و
و
ن
بە توونی بابادا
چ
و
و
ن
هیچ شتێک وەک خۆی نەماوە
نە دڵی ئەویندار
نە خەیاڵی هونەرمەند
نە سۆزی شاعیر
نە سەری سەرۆکەکان
نە ئایەتی سەر زمان و
نە فەرموودەی بن زمانی واعیزەکان
بۆگەن دەمانخواتەوە
هەر گۆشتی زەین نا،
خوێی خەیاڵیشمان گەنیوە!
ئ
ی
ت
ر
و
ا
ی
ە
لە باخچەی بیانوودا، گوڵی متمانە ناپشکوێ
لە تاریکیی تۆڵەدا، چرای لێبوردن نادرەوشێتەوە
لە دەراوی ئاژاوەدا، ئارامیی ناڕژێ
لە ماڵی گریاندا، پێکەنین غەوارەیە
نوێژەکانمان لە بێ تەقوایی، جێ ناگرن
نزاکانمان لە بێ ئیمانی، گیرا نابن
وەک میراتگری شەڕ
هەر وێردی شەڕ وەرد دەکەینەوە و
هەر خاکی خوێن دەکێڵین
ئەم نیشتمانە جگەرەکێشەشمان سەیرە،
هەر دووکەڵەکەی بۆ ئێمەیە
ئەم ئاسمانە بەرینەمان عەجیبە،
هەر هەورەکەیمان پێ ڕەوا دەبینێت
ئەوەی کە ڕەنگی نیشتمان لە دڵماندا کاڵ دەبێتەوە،
حیکمەتەکەی لە گیرفانی سیاسییەکاندایە
ئەوەی کە هەموومان خەیاڵمان سواری سەرهەڵگرتنە،
ڕازەکەی لە جانتای حیزبەکانیان
کە دڵمان لە بێدەنگیدا دەمرێ و
ڕۆحمان لە غەریبیی خۆیدا دەوەرێت
بۆ نهێنییەکەی،
گیرفانی ئەمان بگەڕێن و
جانتای ئەوان بپشکنن
چ
و
و
ن
بە توونی بابادا
چ
و
و
ن
موژدەی شۆڕش
خەونی خەبات
خوێنی شەهید
ڕۆژگارەکانی متمانە و
شەوگارەکانی دڵنیایی
ن
ە
م
ا
ن
هیچیان
ن
ە
م
ا
ن
