مێزێكی سێگۆشه ئێمه له شه‌وێكی سارد كۆده‌كاته‌وه
بێکەس حەمەد قادر/ شاعیر/ هەولێر
ئێمه دوور ده‌ڕۆین
دۆل و چیا دەبڕین
هه‌وره‌كان نزیك نزیك ده‌بنه‌وه
ته‌م له‌سه‌ر په‌نجه‌ره‌ی ماشێنه‌كه‌مان ده‌نیشێ
له‌به‌رزی و نزمی ڕێگا
له ناسینه‌وه‌ی دره‌خته‌كان
من زمانم وشك ده‌بێ و
ده‌سته‌كانم ده‌له‌رزن و
جگه‌ره‌كه‌م بۆ داناگیرسێ
چاوه‌كانم ڕێگای دوور ئازاری داون
كاتێ له ڕێگای دوور كه‌سێ باسی عیشق بكا
له كاتی بیانۆهێنانه‌وه‌ی جێهێشتنی
من په‌نجه‌كانم توند لێك گیرده‌كه‌م
كاتێ په‌یكه‌رێك ده‌بینم چیرۆك ده‌گێڕێته‌وه
ئێواره‌یه‌كی سارد
مێزێكی سێگۆشه
له ژوورێكی لاچه‌پی شار
به ده‌م ژاوه ژاوی با
ژنێك گۆرانی بۆ عیشق ده‌ڵێ
ئێمه له په‌نجه‌ره‌وه ته‌ماشای تاریكی شه‌و ده‌كه‌ین
ده‌مانه‌وێ له خه‌ونه‌كانماندا له‌سه‌ر قه‌دی دره‌ختێ بنووسین ژیان
له ته‌ماشاكردنی ئه‌ستێره‌كانی به ئاسمانه‌وه تیشك ده‌رده‌ده‌ن
له عاشق بوون ڕووناكی له‌سه‌ر ده‌ستی چه‌په‌مان بنه‌خشێنن
سێبه‌ری تۆ له شه‌وی تاریك دا
له نێو ڕه‌نگی بێ ڕه‌نگی مندا
له ئێواره‌یه‌كی سارد دا
ته‌نیایی ده‌خه‌ینه ده‌ره‌وه‌ی ته‌نیایی
ئێواره‌یه‌كی سارد
له مێزێكی سێگۆشه دا
من ده‌ستی ڕاسته‌م له ده‌ستی چه‌په‌ی تۆ گرێ ده‌ده‌م
چه‌ند منداڵانه خه‌ونی گه‌وره ده‌بینم
حه‌زم له كاتژمێره كۆنه‌كه‌ته
ئاره‌زووی گه‌ڕانه‌وه‌ی دوێنێ ناكه‌م
ده‌مێكه عیشق قیبڵه‌نمای منه
ئێواره ئاواده‌بێ
سبه‌ینه پێده‌كه‌نێ
من چ جوان خه‌یاڵان ده‌كه‌م
چ جوان خۆشمده‌وێی
ژاوه ژاوی با
سه‌مایه‌كی جوان به پرچی گه‌ڵاكان ده‌كا
ئێمه له مرۆڤ بوونماندا
چه‌ند جوانین
ئێواره‌یه‌كی سارد
مێزێكی سێگۆشه
كۆمان ده‌كاته‌وه
***
له ده‌مێكی بچوك
هێنده‌ی ده‌نوكی چۆله‌كه‌یه‌ك
ده‌توانی باسی به‌خته‌وه‌ری بكه‌یت
ئه‌گه‌ر له خه‌ونیش دا
بیبینی بۆ ئه‌و
ئێواره‌یه و ته‌م چیا سپی پۆش ده‌كا
ئێمه ده‌ڕۆین و شار جێ دێلین
ئێواره به قاوه‌یه‌كی تاڵ ده‌سپێرین
ژنێك به ڵێوێكی سور
مژێكی قوڵ له جگه‌ره‌ی نێو په‌نجه‌كانی ده‌دا
پێكێكی خه‌ست له شه‌وێكی سارد
بۆمن مشتی شه‌راب ده‌كات
له ده‌مێكی بچوك په‌یڤ ده‌بارن
ژیان و خۆشه‌ویستی
په‌رش ده‌بن
ئێمه چه‌نده جوان ته‌ماشای ته‌می ڕێگا ده‌كه‌ین
چه‌نده جوان چاوه‌ڕوانی له چاوه‌ڕوانی ده‌هێلینه‌وه
بۆ ئه‌وه‌ی ژیانمان خۆشبوێ
باران ده‌كه‌ینه بیانۆ
دڵته‌نگی به رێگا ده‌سپێرین
پێكه‌وه بریارمان دا
ژیانمان خۆشبوێ
ئێمه بیانۆ ناهێڵینه‌وه
تاله عاشق بوونی خوناوی سه‌ر گوله‌كان بكه‌ین
له ده‌مێكی بچوك وشه‌ی خۆشمده‌وێی
ده‌كه‌ینه قیبله‌نمای جێگه‌ی ژووانمان
ره‌نگه تۆ گۆچانێك
له ده‌سته‌كانت بگری
منیش پاسه‌وانێكی خراپی
ڕێگای هیلاكی گه‌یشتنی تۆ بم
دابڕانت كۆتایی ته‌مه‌نی من بێت و
ده‌ستپێكت چله نێرگزێك بێت
ڕه‌نگه من خۆشم نه‌وێی
به‌لام وشه‌یه‌كم پێویسته
بۆ هاتنی تۆ
بۆ ناسینه‌وه‌ی تۆ
هه‌موو ئه‌و شتانه‌م پێویستن
چاوه‌كانت كه دوور دوور ده‌ڕوانێ
پێیه‌كانت كه له ئه‌رزدا چه‌قیوون
له ته‌ماشاكردنی ئاسمان
كه باران چاوه‌كانم ته‌ڕ ده‌كات
له بیری من دا
عیشق هێزه
بۆ له بیركردن
ره‌نگه گۆچانێك
یان چه‌ترێك بۆ پیاوێكی پیری وه‌ك من
پێویستی بێت بۆ په‌ڕینه‌وه
ده‌سته‌كه‌تم بدێ تا ته‌می ڕێگا
نه‌ڕۆیشتووه
بۆ ئه‌وه‌ی ئاوێته‌ی ته‌م و باران و رێگا و
سه‌فه‌ر و ژیان ببینه‌وه
چه‌تره‌كه‌ت فڕێ بده
با باران له‌م ڕێگایه
به‌نێو پرچی تۆدا
ڕێگا و په‌نجه‌كانی من
ته‌ڕ ته‌ڕ بكات
تا له ده‌مێكی بچوك دا
گوێ له گۆرانیه‌كی تازه بگرین
ئێمه له سه‌فه‌ره‌كانمان دا جوانترده‌بینه‌وه
ده‌سته‌كانمان هۆگری رێگا بوون
