سوریالیزم

سوریالیزم جێگای ڕیالیزمی گرتۆتەوە

ئیدی لۆژیكیش مۆدی نەماوە

گەر بڵێن

دەریالوشی هێمن هیشك بووەو

كێوی قەندیلیش ڕۆیشتووە بۆ ئەریتریاو شوێنەكەی بووە بە بیابان

یان بڵێن

مەڕەكان شوانەكانیان دەبەن بۆ لەوەڕ

زەنگوڵەكانیشیان كردونەتە مل و

بەكتریە ڕەشەكانیشیان چای لێ دەنێن !

من باوەڕدەكەم

چونكە

كە لۆژیك نەما

دەگونجێ هەموو شتێك ڕووبدا!

خۆدەمێكە

كەروێشك ڕاوی تاژی دەنێن

خەڵكیش بەڕۆژ لەخەودان و

شەوان بۆپیاسە دێنە دەر!