لەچاوەڕوانی ئومێدێکدا
محەمەد سۆران/ شاعير / کەرکووک
بێدەنگیت کەنارێکی پڕ نەورەسە،
منیش کەشتیوانێکی ماندووم،
لەجەنگی شەپۆلە تووڕەکان
دەرباز بووم.
نیگاکانم تیژ کردووە و
سەیری ئاسۆ دەکەم،
دەگەڕێم بۆ شوێن پێیەکانی تۆ.
من ئەم بەیانییەم خۆش ناوێت
کە تۆی لێ دوور خستمەوە،
وەڵامی نیگا بێ نازەکانت نەدامەوە.
خۆت دایە دەست شەپۆلەکانی غەریبی و
ئەم شارەت کردە بیابانێک
کە سەرابەکان بەرچاویان گرتووم.
ناتوانم ئاوێنەیەک بدۆزمەوە،
بۆ سەیرکردنی ڕووخسارە پیرەکەم.
دەمەوێت بمکەیت بەمنداڵێک،
بۆ ئەوەی لەکونی دەرگاکانەوە
سەیری ژوورە تاریکەکانی
گەورە بوون بکەم ،
سەیری ئەو دیوارانە بکەم
کە تەنیایی ڕەنگی کردوون ،
سەیری شارێک بکەم
ئاسمانەکەی بارانی سوور دەبارێنێت.
ئاهــ ….من لەم سەری شارەوە بۆت دەگەڕێم،
کەچی تۆ لەوسەرەوە ون دەبیت!
ناکرێت لەم شارەدا
هێندە تەنیابم،
شەوان بچمە باوەشی کتێبەکانم و
ئێوارانیش دەست لەمل،
لەگەڵ بێزاریدا
بەشەقامی بێکەسیدا شۆڕبینەوە.
دواتر دەچمە ناوەڕاستی شار و
سەیری ئاسمان دەکەم،
هاوار دەکەم و
دەڵێم بگری، بگری
بۆ ئەو شەوانەی کە تریفە نادیارە.
من خاڵیم لەخۆشییەکانی منداڵی،
بیرەوەریم نوقمی نائومێدییە.
بەئاواتم شەوێک مەرگ یەخەم بگرێت و
شیوەنی پێنووسەکەم،
هەمووان هەراسان بکات.
ئیدی ئەم شارە گۆڕستانێکە
کێلەکانی هەموو شکاون ،
کەس خۆشەویستی نادۆزێتەوە ،
کەس ئیشق نادۆزێتەوە ،
کەس وێڵ نییە
بەدوای مەعشوقدا
تەنیا من نەبێ.
دەترسم ئێوارەیەک
خەیاڵ بەدەم ڕێگاوە ماڵەوەم لێ ون بکات و
بمێنێت بۆ لای تۆ.
بۆیە ئازیز ونم مەکە،
چونکە بۆنی ماڵئاوایی دەکەم.
