هایکوو
ڕێبوار فایەق./ شاعیر / سلێمانی
لەو دیو تاریکییەوە،
هەر نوور نییە –
گڕیش دەمسووتێنێ !
کە هەنگاو بۆ ڕۆیشتن دەنێ،
خۆڵ دەگری –
بایش دەبێتە گێژەڵووکە!
ئاو هەر ئاوە،
ئەی فرمێسکت
بۆ بە مرواری دەچێ !
گەردن بەرزە چیا،
لێ گەردنی تۆ
پلوورەی بەفرە !
هێلانەی هەڵۆ،
بەرز بەرز دەبمەوە –
چاوت لە ئاسمانە!
مێشوولەکان هەراسانن،
” با ” بە پیری نەی دەژەنێ –
دووکەڵ!
چەمی چاو،
خوڕەی ئاوێکی گەرم –
دڵ فێنک دەبێتەوە !
٠کەوانەی خەم،
تیرێک بە دڵەوە
چ هاوکێشەکی هێزە!؟
گۆڕێک لە تەنیایی،
کێ دەربەستە
پێ بنێ بە دڵدا؟
هەژموونی ژان،
ئەم هەموو پێکەنینە
کرمی گریانە !
بەهەشتێکە،
بە ئاوی کەوسەر لێوڕێژە –
ئامێزی تۆ !
با و مشتەکۆڵە،
سێوەکان دەوەرن –
ئاوی جۆگە پەنگ دەخواتەوە !
پەڕینەوە،
هەوڵەدەم نەخنکێم –
مەلەی بوون!
بێ خشپە،
لەو دیو کەلەوە هەڵدێ –
مانگ !
پڕ نەشئەم بە خوڕەت،
تۆ هەناسەی ژیانەوەیت –
کچی باران !
خەیاڵم لە سەر قەیتەرانە،
کەمۆڵەی سینەت پڕ دەبێ –
بە چکاوی قژت !
