گوڵێک لەدەرەوەی باخچەیە
بورھان قەرەداغی/ شانۆکار و شاعیر/ ئەڵمانیا..
لەدوریتا دڵم بۆتە بەردی سەرگۆڕ
چاوم بۆتە شەوی زستان
چ پایزێک ڕێی پێگرتوم جوانی جوانان .
بەئومێدی تۆ بەناو زەمھەریرا ئەڕۆم
دەستی سپی نێرگز ئەگرم
دەرگا لەبەیانی ئەکەمەوە.
بەئومێدی تۆ ئێواران پیاسە ئەکەم
کتێبەکەم ئەخەمە سەرسەرم و
بەپێکەنینەوە بەژێر بارانا ڕائەکەم .
بەئومێدی تۆ عەترەکەت لەخۆم ئەیەم
خۆشەویستی تۆو ئەکەم
تەنیایی ڕاو ئەنێم .
(بەخەیاڵی تۆ ڕۆژەکانی ئەو ڕۆژ ژمێرە
ڕەشئەکەمەوە ،
کەچاوەڕوانی تۆم تیاکرد ).
بەخەیاڵی تۆ گوڵەکان ئاو ئەیەم
ئەچمە کافێیەک
دوو قاوە بانگ ئەکەم .
بەخەیاڵی تۆ ھەموو نۆی مانگێک
بەگوڵێکی سورەوە
لەفڕۆکەخانە چاوەڕێت ئەکەم .
بەخەیاڵی تۆ دەستم پڕئەکەم لەئەستێرە
ئەچمە بەردەرگای گوڵەباخ
میوانداری لەتریفە ئەکەم .
ئەڵێم :
بانقوم بین من و تۆ
لەشکۆفەی سوری ئەشقا.
