وامدەزانی
بورهان بەرزنجی/ شاعير / کەرکووک
وامدەزانی
کە گیانم ببێ بەکەشتی ،
ڕۆحت دەکەیتە ڕووبار و
لەئامێزتا هەڵمدەگری .
وەک دەروێشان
زڕەی زنجیری دەفم بووی ،
جەستەت دەبوو بە خانقام .
سەرمام دەبوو ،
فووت لە نێوی دەستی ئەم عیشقەت دەکردم و ،
دڵت دەبوو بەئاگردان .
دەبووی بەئەستێرەی بەختم و
بەڕووی ڕیشۆڵەی ئەوینما پێدەکەنیت .
ئێستا …
وەکو ئاوی ڕژاوی ئاورشێن ،
نە خەندەت دێتە میوانیم ،
نە ڕۆژگاری بریندارم تیمار دەکەیت .
کەڵەشێری بەختمان خەوی لێبکەوێ ،
نەڕۆژگارمان ،
لەخەوی خاو
هەڵدەستێنێ ،
نە چۆلەکەی چاوەکانمان،
جارێکی تر ،
لەسەر داری بەخت دەخوێنێ .!
٢٠٢٤/٩/٢٥
