من، تۆ دارسێوەکە

من ، تۆ دارسێوەکە

نەشمیل عەلی بەرزنجی/ شاعیر / سلێمانی

‎لایبە تێکی بە ئەم ژیانە
‎بابچین بۆ شاخ لەسەر چرپایەک پاڵکەوین
‎ئاسمانمان ببین و مەل ،کە ئەفڕێت
‎کرم لەولەوە ورد ورد زەوی ئەدرێ
‎تێهەڵدە ،ئەم ژیانە خۆشەویستی تیاناکرێ
‎بابچینە لای رووبارێک پشت لە پشت پێبکەنین
‎ماسی ببینین
‎دارکونکەرە ..تەق تەق
‎بیڕوخێنە ئەم ژیانە
‎با دانیشن
‎ڕاکە ڕاکە ناگەینە هیچ
‎چاویلکەکانت بیر نەچێ ئەچینە دەشت
‎بۆ سەیری خۆر
‎ئەم ژیانە م ناوێ دیوار دیوار
‎سەرناکەوم
‎درەخت هەیە وەرە بڕۆین
‎با سێو بدزین
‎گاز گاز  گاز بدەین  دورتر بڕۆین
‎ئەم ژیانە گەورەیە جێگا ئەگرێ بەجێ بێڵە
‎من ڕەنگ و تۆ فڵچەیەک  بین
‎پێکەوە نەسیم بکێشین
‎دورودرێژ لێی بخەوین
‎خەونی ژیانێکی سادەتر ببینین
‎با تف بکەین لەم ژیانە
‎تۆنەتەوێ پێکەنینم لەم دیوی ئەم
‎سوراوانە
‎لێوم بگرە ماچم بکە
‎من نامەوێت پارەی زۆرت دەستم بگرێ
‎نزیکم بە
‎دەستم ئەوێیت و ئەو شانانە
‎لێم دور مەبە
‎بابۆنی بکەین
‎سەوزای و پێکەنین و متمانە
‎لەهۆش بچین
‎لایبە تێیهەڵدە ئەم ژیانە
‎کارتۆن جوانی
‎ناو ناخۆشە
‎ئەڵێی ریکلامی دەرمانە
‎شعروگۆرانی و گوڵم ناوێ
‎بێدەنگی بێدەنگی بێدەنگی
‎زمانی باپیرنمانە
‎زمانمان باگۆنەکات تیاینەماوە
‎ئەگەر ناتوانین درێژ درێژ درێژ
‎بڵێین گیانە، جوانە، خۆشەویستی مناڵی، پاکی
‎بیبڕین با ئەو زمانە
‎لەم دیوی سوکانەوە
‎سوکی ئەکات مرۆڤ بونمان بەدەنگی بەرز
‎لەگەڵ هۆڕین پێکەوە
‎ناگونجێ ئەم
‎ژیان
‎بیفلیقێنە  ئەم ڕۆژگارە
‎کەتیایە تۆ گرگنیت و منیش پاشکۆی
‎با مرۆڤ بین
‎هەر بەرێکەوت و وەک ئەوەی ئێستا
‎یەکەم نیگامان بێت
‎دەست بگرین و لەسەرەتاوە دەست پێ بکەین
‎بێزاربووم
‎لە نوقتە سەری دێڕ
‎تێکی بە تێکی بە تێک
‎ڕازی نیم ڕازی نیم ڕازی نیم
‎ئەم ژیانە خۆشەویستی تیاناکرێ
‎با بچینەوە بۆ  بەهەشت
‎ئەم چیرۆکە بگۆڕین تۆ بخەوە
‎من دێمەوە
‎نێو سنگی تۆ
‎هەستە بەخودا بڵێ نامانەوێ ئەو ژیانە