ئیمپراتۆر کۆمپیۆتەر

وەکو بتێکی بەگیان لەبەردەم دکتۆرە نازدارەکەم چەمامەوە

لە هووردی تا درشتیم بۆ گێڕایەوە…

ئەویش پەلەی بوو، بەهێمنی گوێی لێگرتبووم

هەندێک بزر بوو،

کە هاتەوە لام گوتی: کۆمپیۆتەر دەڵێت، ئەم برادەرە دەردی گرانە و سەد کونی تێبووە!

گوتی: کۆمپیۆتەر یێژێت تۆ ناتوانی بیر بکەیتەوە

ئێرە پڕە لە دۆلار.. پڕە لە جوان و مزگەوت و کەنیسە و خوا..! زەریخانەیە بیر بکەوە

کە گەیشتمەوە ماڵێ.. ببورە کە گەیشتمەوە بێ شوێنیم

بیرم نەکەوتەوە

شەست ساڵێک لەمەو بەر، داپیرم دوو فڕوجی کردە خێر،

داپیرم لەناخەوە دەگریا و دەیگوت

وەی هەشمان بەسەر، وەرە قووتە پیاو، خرتۆ وەرە،

شێخ گوتی، چاوزارە، ئەمە دوو نووشتە و سێ چوارشەم و چەند سەلکە قەندێک چارەیەتی..!

کتێب، کتێبی پیرۆز، کە کەس ناوێرێ لێکی بکاتەوە گوتیەتی…!!

ئاوەکەی بخۆوە و بەماڵدا بیپرژێنە

چوومە قوتابخانە گوتیان کۆمپیۆتەر تاقیت دەکاتەوە

چوومە نێو ئۆتۆمبێل، گوتیان کۆمپیۆتەر هاوڕێی ڕێگاو بانت دەبێت

کە قسە لەگەڵ خودای لە حەوت ئاسمانان دەکەیت

ئەنتەرنێت دەیدۆزێتەوە

کە مردم و لەنێو قەبر گوتیان بی کۆمپیۆتەر.. بێ مەعریفە.. بێ میمۆری

تاوانکاری لە کۆمپیۆتەر نەترس

ئایا دەزانی ناوی کۆمپیۆتەر…؟

ئایا دەزانی کیبۆرد و میمۆری و مەزەر بۆرد و هارد و کلیک و سپەیس چییە؟

ئایا تۆ لەگەڵ کۆمپیۆتەر بە شکۆوە جووڵایتەوە؟

ئایا دڵی کۆمپیۆتەرت شکاندووە، دزیت لێکردووە؟

ئایا کوفرت و درۆت لەدژی کۆمپیۆتەر کردووە؟

حەرام زادە، ئیمپراتۆر کۆمپیۆتەر میر غەزەبە،

هەموو شت دەزانێت و هەموو شتی بەدەستە

دواعا بکە دەماری جۆت نەبێت!!

وا تۆقیووم.. نەبێتەوە

لە گۆڕیش بێت، حەزرەتی کۆمپیۆتەر دەزانێت چ خەونێک دەبینم

کۆمپیۆتەر لەهەموو شتێکی من، تەنیا پێشە خۆشم دەزانێت، کەی دەمرم

دەزانێت کەی سێکس دەکەم

کەی دەچمە ئاودەست و کەی چاو دەکەمەوە و چ وشەیەک لەزارم دەردێت

کەی تڕ و فسێک دەنگ بداتەوە، پێشە منیش بۆنی دەکات

هەموو جیهان دەبێتەوە، هیچ

هەموو جیهان کۆیلەی کۆمپیۆتەرە!!