هەتاوێک من و تۆ و نیشتمان دەگەیەنێتەوە یەکتر

وەرزی کۆچی باڵندە و

وەرینی درەختە

باڵندەکان بۆ سووچێکی ئەم جیهانە و

درەختەکانیش بۆ ناو خۆیان کۆچ دەکەن

من هەم درەختم و هەم باڵندە

خەیاڵم دەفڕێ و

لەناو خۆشمدا گرمۆڵە دەبم

تاریکیی بەرگەی گریانی درەخت ناگرێ و

لە فرمێسکەکانیدا دەتووێتەوە

با، دڵی بۆ باڵی باڵندە دەسووتێت و

بە پێی کیسەڵ هەڵدەکات

خەیاڵی تۆ و سێبەری نیشتمان لێم نابنەوە

هەورێکی تووشن لەناو سەرمدا

لە سەری پەنجەکانمەوە برووسکە دەدەن و

لە چاوەکانم دادەکەن

تۆ و نیشتمان دوو برینن لە زەینمدا

برین جۆگەلەیەکی سەرکردووە،

دەڕژێتە ڕووبارێکی خوێناویتر و

ڕێگایەکە بەرەو بێ کۆتا،

ڕێگاش تارمایی و تراویلکەیە!