غەزەل

وەرن هاوڕازی ئازارم کە چاوم ئەسرەبارانە

لە سۆزی سازی دڵ تێگەن کە چەن ناسازی یارانە

ئەگەر سازاوی ئەم ژینەم دەروونم پڕ لە ناڵینە

کە شێعر و سازی ناکۆکیم لە دەزگای داخ و سووتانە

زەمانی پەستی و تاوان، نەمانی عیشق و ئازادی

بە زانین دڕکی چاوانی، نەزانین شەوکەت و شانە

ئەوەی “بیر و وتە و کردەی” بە چاکیی بێ نییە ناوی

ئەوەی ناپاک و سە دڕوو بێ، ڕمی حوکمی لە سەرمانە

“مەم و لاس و وەلی” شەیدا، بە عیشقی پاکەوە سووتان

کەچی “زین و خەزاڵ و شەم” دڕووی “بەکران” لە دڵیانە

هەڵۆی باوەڕ تەرەی کۆچن لە داخی گەمژە میرانێ

قەلی بێشەرمی گەنداوان ئەمیری باخ و بێستانە

ئەگەر دڵپاک و یەکرەنگی بەڵابارانی وەک شاعیر

ئەوەی نەنگی لە لا فەرزە لە هەر لا بەرزی بانانە

لە پۆزی هۆزی بێشەرم و ریاکاران کوان هۆزان؟

هەتا کەی وا تەراتێنی نەزانان و نەیارانە

خەزان گەرچی لە باخی دا و گوڵ و شالووری مەی بردن

بەهارم تازەگوڵ زۆر و هەزارانم هەزارانە…