خۆرێك لە مەچەكی نیشتمانی مندا

کە هێمای نیشتمانم دی لە ئاسۆی بێ خەزانیدا

سروودی سەنگەرم پشکووت لە نێو دیدەی بەیانیدا

نیگای دوور دوور فڕیبوو تا سنووری عیشقی من ببڕێ

كەچی هەر خۆم و خۆی ماوین لە وانەی ئاسمانیدا

ژنێک ئاواتی باخم بوو سەفەر پاییزی لێ نووسی و

خەساری ڕەنجی شێتانەم لە خەونی باخەوانیدا

سەفەر تابلۆیەكی ڕەش بوو لە سەر دیواری ئەم وەرەزە

چ زستانێكی شێتم بوو لە نێو بەستێنی ژانیدا

لەبیرم چۆن دەچێ نامەی دەمی ئێوارە ماچێکی

کە هات شیعری منی برد و لە پرچی نیشتمانی دا

هەتا جامانە وانەی بێ و چیا جێژوانی شاباڵی

خەمی ڕوونی نیگای دەبم و تفەنگێکم لە شانیدا

دەبم بەو خۆری ئاڵایەی هەزار وانەی ئەوینم بوو

كە دەدرەوشێتەوە ئێستا لە بازنەی دەستەكانیدا