من و ئاوێنەكەم

من و ئاوێنەكەم شێتین

لەگەڵ یەکتری دەجەنگين

ئەوکاتەی ئەو بەکوڵ دەگری

من بە قاقا پێدەکەنم

کەئەودەڵێ وەرە

سووراوی لێوانت تۆخکەمەوە

من پەردەیەک

لەسەر ڕووخساری دادەنێم

بۆیە دڵی لێم دەڕەنجێ و

ڕووی زیوینی دەسوڕێنێ

بەڵام ناچار كۆتايى ڕۆژ

ماچێکی ڕۆخساری ئەکەم

یان ئەو دەستێک

بە بەسێبەری پرچما دێنێ و

بەئاوێزان خەمەکانمان بەبا دەدەین

بەڵێن دەدەین

ئاشتبینەوە دووپەیکەرین

من شەختەیەکی قەندیل و

ئەویش کەلـلەی قەندی سەقز

دەبێت شەوێک لەناو دەریای

ئەوینی ڕۆح بتوێینەوە

دەنا دەبێت

هەموو ڕۆژێک

بەگژ ژووان و ئاوێزان

بەگژ خەندەو پێکەنیدا بچینەوە