سەقز

گەڵا گەڵا گوڵەکانی بیرەوەریم،

بەسەر سینگی ئەوینباری ئەم شارەوە

سەوز بوون و هەڵوەریون

لە سەر لێوی هەر پەنجەرەی کۆڵانێکی

لە باوەشی هەر درەختی شەقامێکی

چەند چۆلەکەی سادەی عەشق و

پۆلە کۆتری بیرەوەریم

باڵیان گرت و هەڵفڕیون

وا تریقەی پڕ بریقەی فێرگەکانی

ئامێزی پڕ ڕەنگ و ڕازی پارکەکانی

دیواری پڕ نەفرەتخانەی بەندیخانە و

بزەی وێنەی بەردەکانی گۆڕستانی…

هەرکام جۆرێک حەز و تەزی بیرەوەریم پێدەبەخشن

من بە کۆڵێک یادی تاڵ و شیرینەوە هاتوومەوە

نە چاوی پەنجەرەی کۆڵان،

نە هەستی دارەکانی سەر شەقام

نە باڵندەی باڵکراوی فێرگەکانی،

هیچ کامیان هەر نامناسنەوە و

لە یادنامەی پڕ ئازارم بێ خەبەرن!

ئەمڕۆ میوانێکی نامۆی شاری خۆمم

هەر سۆراغی کۆترەکانی شەقامی ئازادی و

“هەڵۆ”ی مەیدانەکەی شارم دەگرم

دەڵێن: هەیهوو!

خۆ باڵندەی ئەو خەونانەش هەر لە مێژە،

پەڕەوازە و شاربەدەرن…!