گلەیی
پەخشانە شیعر
ھەوار محەمەد/ شاعیر و چیرۆکنووس/ سلێمانی
چەند شاد دەبووم گەر بەیانیان
بە سۆزی گۆرانییەکی ئەو
بەنەغمەی شێعرێکی ئەو
بە مژدەی ویساڵی ئەو
لە خەونی قووڵ ھەستامایە!
بەم بارە قورسەی درەنگ کەوتنەوه
گوێم لە چرپەی ئاوازی بەیانی باشێکی ببوایە
ئەو دەم چی بەدبەختیی شەو درێژین
وەک مەرهەم زامی دڵی ساڕێژ ئەکردم.
لە مێژە دەزانم
سۆزی دەنگی ئەو، تەمی هەموو خەم و ئازارەکانم ڕائەماڵێ
ئەمباتەوە ناو باخی شێعر و گۆرانی
لە ئێوارانی دڵتەنگییم ئەسێنێتەوە!
سۆزی دەنگی ئەو خۆشترین لەرەی ئاوازی مۆسیقایە
چەند خۆش دەبوو تەنها جارێک
لە بری باران، نمنم ئەو دەنگە لەگەڵ وەسڵی ئەوا بباریایە
ئەوکات گشت وەرزەکان با ھەر ھاوین ببونایە
چەند خۆش دەبوو گشت ڕێگەکان تەنھا یەکجار
بۆ لای تۆیان ببردمایە، با تائەبەد داخرانایە
سا چی دەبوو تەنھا یەکجار بەڵام جارێکی ئەبەدی
بۆ خەونێکی جاویدانی میوانی تۆ ببوومایە
ئەوسا با گشت ژیان ھەر زیندان بێت لەئامێزت
هەرگیز گلەییم نەدەکرد نەمدەوت بەختم ڕەشە خودایە.
