رۆژانە سەد وشە دەنووسم

وا بوو بە سێزدە ساڵ، ئاگادارم، لەنزیکەوە دەزانم ”هەواڵنامەی کتێب” لە سویدەوە لەلایەن هاوڕێم چالاک موحمەد؛ سەرپەرشتی، ئامادە دەکرێت. ئیشکردن لە باڵاکردن، دەوڵەمەندکردنی کتێبخانەیەکی ئەلکترۆنی بە دەست، هزر، ماندووبوون، سۆراخ، سکان، کۆپی، رێکخستن، داوا، تکا، ویست، چوونوهاتن ئاسان نییە. بەڵام وا بەردەوامە، پڕە لە کتێبی هەمەرەنگ، هەمەدەنگ، هەمەسەنگ، هەمەجۆر، هەمەناو، هەمەبابەت!

سێزدە ساڵ ئەو پیاوەی کرێکارێکی ماندووی کارگەکانی سویدە، ئینجا دەست، قەڵەم، پەنجە، تەلەفۆنەکانی بۆ هەواڵنامە ناوەستێت، تووڕە نابێت، سڵ ناکاتەوە، هەر دەگەڕێ، ماڵ بەماڵ، شار بەشار، بارەگە بەبارەگە، دیوەخان بەدیوەخان، لە هەموو وەرزەکان، شارەکان، وڵاتەکان دەرۆزە بۆ هەواڵنامە دەکات، شەرمیش ناکات. شانازم زۆر لە کتێبە چاپکراوەکانم لەوێ دانراون، بەردەستن.