لە داوێنی شیعری حەزرەتی مەولاناوە

لە ئاسمانی دڵی مندا،

نە مانگ و نە ئەستێرەیەک،

هەر تەنیا تۆ.

لە شەوگاری ڕووحی مندا،

نە گزنگ و نە ڕۆژنەیەک،

هەر تەنیا تۆ!

تۆ شەوەزەنگ و ڕۆشنایی.

تۆ یەکبوون و لێکجودایی.

تۆ هەم پردەکەی ویساڵ و

هەم سەروەختی ماڵاوایی!

تۆ هەم دەرد و

هەم دەرمان و

هەمیش کوفر و

هەم ئیمان و

هەم یەقین و

هەم گومان و

هەم سەرەتا و

هەم کۆتاییەکەی زەمان و

هەم ئەو بانگە ئاشکرایەی

لە “کان”ی هەق هەڵدەپرژێی.

تۆ خۆشاوی عیشقی حەق و

لە خەڵوەتگەی عاشق دەڕژێی.