پۆستەچی

هەموو شەوێ تا بەیانی

نامە پڕ لەهەستەکانت لەهاتوچۆدان

کانیاوی سۆز دەتەقێنیەوەو

لەتێرمیناڵی دڵەوە

قافڵە قافڵە وشە دێت و

وشە دەروا

رستە دێت و

رستە دەڕوا

خۆشەویستیت لەلام کەڵەگەتتر دەبێ

وێنە ئاسایی و نیوەرووتەکانت

بێ سڵاو دێن و

وەکو دووکەڵی جگەرە

ژوورەکەم سیخناخ دەکەن لەعەتری جەستەت

لەپۆرتریتی شیعر …

ناترسی … جارێك

هەر تەنیا جارێك

پۆستەچییەکانی ماسنجەرو ڤایبەرو واتسئەپ

لەبۆشایی هەواو

لەو ئاسمانە تاریك و هەزار بەهەزارەدا

هەگبەکانیان لێ ون ببێ

یان ( هاك کەرێك ) رێگەیان پێ بگرێ و

رووت رووتیان بکاتەوە

ئەوکاتە هەموو کەون بەنێوانمان بزانێ و

قەڵەمێکی سووریش

هێڵێکی راست و چەپ بێنێ

بەسەر عومەری هەردووکمانا … !!!

عیسا حوسێن