من زەکاتی بێمروەتی

ئەم هەسارە و ئەو کاولگەم !

من سەرفترەی بێبەزەیی

چارەنووس و ئەو مێگەل و

قەلەڕەش و گەلەگورگەم !

مانگی پڕ پڕی بێدەنگیم

سەدەیەکە بێ ویستی خۆم

دەتکێمە ناو

جامی جەمی چاوەڕوانی !

من بەرامەی ماندووبوونی

سەر سفرەی سەفەری ڕاستیم !

گەردوتۆزی خەیاڵەکان

بە ڕووبارە غەمگینەکانی

بێسۆراغیان سپاردم !

من ڕێبواری ڕێگەی دووری

سەرگەردانی باوەڕێکم

ئیدی ئەی دڵ

چ سەودایە ؟!

کەمن قەت خاترجەم نەبم !

ئەی خودایە

لەوە زیاتر من مەخەرە

ژێرچەپۆکی بیرەوەری و

بێهودەیی و تاسە و برين !!

ماریا ئەحمەد 12-4-