تۆی

هەواری سەوزی ئاوات و گوڵی سادەی ئەوینم تۆی

هەتا هەست و هەناسەم بێ، پەریزادەی ئەوینم تۆی

هەتا دەمرم قەرزباری ختۆكەی نامەیەكتم من

هەتاكوو ئەوپەڕی شاری غەریبیی من، برینم تۆی

بە هەر كوێدا دەڕۆم دار و شەقام یادت دەپرسن لێم

دەزانن نوێژ و ئەلف و بێ و وشە و ڕێباز و دینم تۆی

لە ساتێكدا بزەم دەخزێتە لێو، چاویش بە فرمێسكم

بەڵێ چاوگەی ئەوین و خەم، گرین و پێكەنینم تۆی

بیابانی تەمەن تا چاو هەتەر كا وشكەڕۆ و قاقڕ

لە لووتكەی نائومێدیدا نمەی بارانی ژینم تۆی

دڵی تێدا نەبوو سینەم، دەمێ بوو مردبووم، ئەمما

لەوێ ترپەی ژیانێ هات، كە سەیرم كرد، دەبینم تۆی