چڕینی ئاوازە غەمگینەکانی ڕاز و نیاز
ڕێڤان جاف/ شاعیر/ هۆڵەندا
لە هەگبە و هەوارگەی بێ شەوقەوە
لە زەردەپەڕی خەزانی عومرەوە
لە زنەی سەرنجێکی بێ جیلوەوە
لە موبتەلای میحنەت و دووری هیجرانەوە
لە دەردی بە عەمبارکردنی حەسرەت و کزەکزی مەراقەوە
لە قەهر و ئاخ هەڵکێشانی دۆشداماویی و ئەسارەتەوە
لەتاریکیی و سەرگەردانی قەدەری بێ تێشووەوە
لە بێنەوایی و سکاڵای دڵەی گوشراو و تەنگەوە
لە بێبەزەیی و داخراوی گەنگەشەی پڕ کەلێنەوە
لە وێرانەی ڕووگەی دڵ و ڕێچکەی سەبووریەوە
لە خەراباتی ڕێباز و مەودای ئەزموونی ژیانەوە
لە وەیل و بەهیلاکچوونی هەوڵ و هەڵپەی ماندووبوونەوە
لە واق وڕماویی داڕمانی بنگە و بناغەی بەهاکانەوە
لە سەهۆڵبەندان و لێکترازانی نەسیمی ئەوینەوە
لە بێحەوسەڵەیی و توانست و تاقەتی هەڵپڕووکاوەوە
لە ڕەنجەڕۆیی و سەرکۆنەکردنی دەرفەتەوە
لە ژەهری قەسمێکی پووچ و تفت و تاڵەوە
لە بۆچڕوکی زام و وردوخاشی ڕۆحەوە
لە دووڕیانی ترس و شەوەزەنگی دەستی گومانەوە
چ گیرۆدەبوونێکی وێڵ و کۆڵەوار و داهێزراوە!
چ ئولفەتێکی بە کۆت و بەندی پڕ زووخاوە!
چ خواستێکی پەرت و خنکاوی سەرکوتکراوە!
چ حەلوفەسڵێکی قەلس و بێ جەوهەری چاوەڕواننەکراوە!
چ گرێکوێرەیەکی هەلاهەلای ئاڵۆزکاوە!
چ پەلەقاژێیەی کز و بێ هوودەیە!
چ یاخیبوونێکی سست و بێ داڵدەیە!
چ ڕوانینێکی بێ سۆراخ و بێ ڕوانگەیە!
چ چاوەڕوانییەکی بیمار و پڕ تاسەیە!
چ تاوتوێکردنێکی ناکۆک و بێ چارەیە!
چ تالع و بەختێکی نیوەچڵی نادیار و نادیدەیە!
چ پەیامێکی بێ مانا و مەغرایە!
چ سەرابێکی شەقارشەقاری بێ مەئوایە!
چ ئومێدێکی مەحاڵ و بێ ورشەیە!
چ نیگەرانیەکی لاڵ و بێ قەرار و ئۆقرەیە!
چ دەستپێشخەرییەکی نابووتی سواو و مایەپووچە!
چ ژوانێکی بێ نەزم و تاریک و تاری خامۆشە!
چ پێشبینیەکی شێواوی درەنگ وەختە!
چ بێدەنگیەکی مات و مەلوول و بێزراوە!
چ عیشقێکی بێ تەرزی ڕشتە پچڕاوە!
چ بارگرژییەکی جاڕز و نەخوازراوە!
چ تەدارەکێکی گرژوتاڵی تەواونەکراوە!
چ عاقیبەتێکی لەرزۆک و پەنهانی کپکراوە!
چ زیکرێکی گەپجاڕ و گەوجانەیە!
چ پێداگرییەکی مناڵانەیە!
چ حەزێکی گێلانەیە!
چ………
گەیشتن بە سایە و سێبەری گولستانی ئەو
گەیشتن بە کەمال و ئاوێزانی ڕۆحی ئەو
گەیشتن بە مەحرەمی ڕاز و نیازی ئەو
گەیشتن بە مەسکەنی ئاسوودەیی و خاترجەمی ئەو
گەیشتن بە مەیلی مەستبوونی عیشوە و نازی ئەو
گەیشتن بە جیلوەی جوانی غەمزەی چاوی ئەو
گەیشتن بە جەژنی نەشئە و نەبرەی دەنگی ئەو
