سەودالیێ
مەحفوز مایی/ شاعیر/ دهۆک
ھایلی دینێ سەودالییێ
دسەفەرا ئەڤینا تەدا مام بێ سەودا
مینا تەیرێ
ژ بلنداھییا ئاسمانی ھاتی و
بەرەف نزماتییێ خوە بەردا
لسەر ئەردی كەت ناڤ تەڤنێ دەردا
مینا شێخێ
روی ژ مزگەفتێ وەرگێرای
دێر كریە مالا ئەڤینێ
لێ پالڤەدای
سەودالییێ
تۆ سەحكە من
ئەز ژ ئەلندێ بێھیڤیبوونێ دەركەتم
ئەز چووم
چوون یا پێنگاڤێت من دخووت
دڤی باژارێ بێخەودا
نە چوون دھێت و نە مانەڤە دچیت
من دڤێت بچم
ژبەر تە
ژبەر مانا دگەل ئەڤینێ
بۆ ڤەگێرانا خەونا بۆ بەرماكێت مە
بۆ شیرڤەكرنا زارۆكێت ئەڤینا مە
بۆ وان ئێڤارییا
كو ئەم ل خەریبییا ھاویشدكرین
ئەڤ چوونا من
بۆ ئاشتكرنا با و بەفرێ یە
بۆ زڤراندنا دلێ زیزبوویە
بۆ فراندنا چویچكا زیندانكری
بەرەڤ ئاسمانێ ڤالا و بێستری
ئەڤ چوونا من
ژبەر تەیە
بوو نیاسینا ئەڤینێ و ژێحەزكرنێ یە
ئەڤ چوونا من
بۆ دیلكێ دونیا بتەنێبوونێ یە
ئھا ل وێ دویرییا من
تۆ دێ گەھیە ئەڤینا من بۆ تە
دێ ژنوی خوە بۆ دەیە نیاسین كا تۆ كی
نەبێژە من: دێ بۆچی چی
تۆ بزانە
دناڤ مالبێچكا ئەڤینییێ دا
دناڤ كاكلكا رحا من دا
من ھەناسەیەكا كویر ژ ئەڤینێ ڤالا ھێلا
چوونا من
دا تۆ دناڤ ڤالاھییا وێ ھەناسێ دا
ھەست ب ئەڤینا من بكەی
دا بزانی من چەند تۆ ڤیای
دا ھەمی ئێڤارا
چاڤەرێی ڤەگەرێ بی
دا تۆ و بەرماكێت ھەیامێت مە
دناڤ شیعراندا كەھی ببن
كو ئەز چووم
زیندانا دوودلییێ من دگەل خوەدا بر
دێ ل بیابانێ تەنێبوونێ ھێلم
بلا گورگێت دوورا تە ھار ببن
بلا ھار ببن و ئێدی كێلبا ل ڤالاھییێ بدەن
ھەكو من دگووت
ھشیاربە ل دوورێت تە گورگێت لویرن
تە دگووت ئەو نە گورگن
ئەو دەنگێ بانگێ مەلایە
ئەز چووم
دا دەنگێ لویرێنا گورگا
بۆ سەفەرا دەریێیت داخستی
بۆ رەشەڕۆژێت رەشپووشا
یێت دلێت وان ژ عەبایێ وان رەشترە بھێلم
ئەز چووم
دا ل پاشی خوە
بۆ تە بوھارەكێ بھێلم
تێدا
لویرێنا گورگا لبەر تە نەبیتە دەنگێ مەلای و
پێ ببستری
تێدا رەنگێت كولیلكا ببینی
كولیلكێت بێستری
ئەز چووم
دێ پاشی خوە
ھندەك بەرپەڕێت ڤالا بۆ تە ھێلم
دا تۆ رۆژگارێت بێی من بنڤێسی
دوو گولان ژی
ل سەر لێڤا پەنجەرا مالا مە یا ھەرفتی
دێ بوو تە ھێلم
دا تۆ ژ بێھنا وان ھەردوو گولا بێھنا من بكەی
دا ئەو ھەردوو گول ژی
دچاڤێت تەدا من ببینن
دێ پاشی خوە
ھەردوو چاڤێت خوە ژی ھێلم
دا بۆ تە ببن كانیبوھاریك
دا روندكێت بیرھاتنا ببینی
دێ بۆ تە ھێلم
وێنەیەكێ خوە دناڤ گەڤسكا بیرھاتنێت تەدا
دا كوڤاندارییا من ببینی
دێ پاشی خوە بۆ تە ھێلم
پێلەك ژ دەنگێ من
دناڤ ئاوازێت سترانا من و تە حەژێدكردا
دا ھەستبكەی
دەما ستران دناڤ پێلێت رحێدا تێكەل دبیت
ئەز چووم
بلا تە ھای ژ خوەبیت
دناڤ بەحرا مەندا خەیالێت من دا نە خەندقی
ھای ژ ھەدوو گولا ھەبیت
نەچرمسن كو بێھنا من و تە ژێ تێ
دا بێ ستری مەزن ببن
ھای ژ بیرھاتنێت تەحل و شرین ھەبیت
كو زادێ ھەبوونا من و تەنە
تە ھای ژ دەنگێ دەری ھەبیت
نەكو دەنگێ پێنگاڤێت من تە بخاپینن
تە ھای ژ خودیكا ژوورا خوە ھەبیت
نەكو وێنەیێت من كرێت نیشا تە بدەت
تە ھای ژ ھەنارا حەوشێ و
گولێت باخچەی و
كولیلكێت سەرێ سپێدا دبشكفتن ھەبیت
دا تۆ ھەرو رۆژێت خوە پێ نوی بكەیەڤە
ئەز شووم
بلا تە ھای ژ خوە ھەبیت
كێم بخوینە
بلا چاڤێت تە ماندی نەبن
دا ئەگەر جارەكێ
پێلەك ژ بایێ مرازا ئەز ئینام بەرامبەری تە
دا تۆ باش رەنگێ من یێ پۆسیدە ببینی
دا بزانی
ڤێ سەفەرا چوونا من چەندە ئەز یێ پۆسیدەكریم
ئەز چووم
بلا تە ھای ژ ھەیڤێ ھەبیت
ئەو لاندكا بیرھاتنێت م و تەیە
بلا بشەڤێ ھەیلاكا بۆ تەنێبوونا تە بێژیت
ئەز چووم
تۆ نەھێلە چوونا من
رحا من پاڤێتە ناڤ پێلێت تەنێبوونێ
رحا من زاروویەكی ساڤایە
ژ تەنێبوونێ دترسیت
ئەز چووم
تۆ دخەیالا خوەدا دگەل من بە
بۆ خاترا من
تیرۆژكلت ھەتاڤێ كومكە
بۆ من دناڤ قولاچكێت تاریدا ھەلگرە
ھندەك جارا
وەكە خەیال
دگەل من بفڕە
بەرەف سروشتێ ژیانێ
دگەل من بە
وەك مامزا دەربازبوویی ژ دەڤێ گورگا
بۆخاترا ماسیێ دھشكاتییێ دا
بۆخاترا وێ بەلاتیفكا حەتاڤێ پەڕ لێ سووتی
بۆخاترا كەڤۆكا بێھێلین
بۆخاترا پێلەھەورا پڕگرین
دگەل من بە
بۆ خاترا ئێڤارییێت بێ ھەدار
بۆخاترا ئارونكا چاڤەرێبوون و ھاتناڤە
ھاتنەكا بێ ڤەگەر
ئەز چووم
دا بۆ تە ھەزارویەك پەیڤان
ژ ناڤ وارێ تەنێبوونێ بینم
دا بۆ تە
واتەیا پێكڤەبوونێ بینم
پارزینەك ژ خوشبەختییێ
بشكورینا ھەیڤێ
كەنیەكێ لال بۆ تە بینم
ئەز چووم
دا دگەل چوونا بێڤەگەڕدا
سواری پێلەھەورێت پاییزی ببم
ببم باران
ل ھنداڤ تە
مینا خوناڤەكا تەزی
ل سەر لاشێ تە ببارم
ئەز چووم
دا دەستویریێ ژ نزار قەببانی وەرگرم
ژ فەرھەنگا بێدەرا ھەلبەستێت ئەڤینیێ
جوانترین پەیفان ھەلبژێرم
(اشھد ان لا امراة الا انت)
كراسێ كوردی بكەمە بەر و
دبەژنا تە وەرینم
ئەگەر ئەڤ چوونا بێڤەگەر ھات
دێ قەستا مالا خوە یا بێدەنگ كەین
دێ سەروژنویكا خوە نڤێسینڤە
دێ دارھەنارا حەوشێ و
كولیلكێت سپێدەھییا ئاڤز بن و
دێ زێنەڤە
دێ پێكڤە
ھەیڤا زیزبووی ئاشتكەینەڤە
دا جوانتر بۆ مە بكەنیت
ئەگەر ئەڤ چوونا بێڤەگەر ھاتەڤە
دێ پەیڤا حەژێكرنێ كەینە دوو جامێت شەرابێ و
پێكڤە ڤەخوین
دا شەرم و گونەھان
دنامەیەك ڤەكری دا ڤرێكەینە جەھنەمێ
ئەگەر ئەڤ چوونا بێڤەگەر ھاتەڤە
دێ گۆڤەندەكا بێخاس كەین
دویر ژ باژێری
دێ مالەكێ ژ داڤێت ئەڤینێ چێكەین
د ناڤ سەرما بەفرێ ژی دا
دێ گەڤسكێت حەژێكرنێ چێكەین
ئەگەر ئەڤ چوونا بێڤەگەر ھاتەڤە
دێ پێكڤە فرین
