نانۆ چوار
دەقی : هاشم ئەحمەد سەڕاج
شاعير – هەولێر
1
تەنوورە
پڕماچى گەرمى ئوتووە
2
گێزەر
شمشێرى نەرمى سرووشتە
3
کورسى
فریودەرى نیشتەجێکەیەتى
4
ماسى
بیابانى بوایە باڵیدەگرت
5
گوڵ
عەترى بۆ بایە
پەڕەى بۆ خۆڵ
6
چنگاڵ
هەڵوەداى کریم چاپە
شێلمیش
7
تەمەن گەردەلوولە
هەڵدەکا و دیارنامێنێ
8
دوومەڵان
تێکستە
نەگوتارى هەیە نە ڕەچەڵەک
9
سڵق
ئاوەڵکراسى کچانى ئەمازۆنە
10
دەرگا کۆیلەى کلیلە
11
جەستەى برۆنزیت
تامى لیمۆى ترش دەدا
12
بوون
یەخسیرى
کردەى کرانەوە و داخرانە
13
لەچکت
بۆنى مێخەکى لێدێ
14
جوانیت نیگەرانم بکا
الپەڕەکان
هەڵدەدەمەوە
15
شێوەت دەرکەوێ
گیانم بەبەردادێ
16
تەمەن
کەفى کەسکى سابوونى ڕەقییە
17
مەرگ
جلى ژێرەوەى ژیانە
18
زەمەن
سەللەى مووسى ڕیشتاشینە
19
فڵچە
بەمەعجونى ددان
عەمرم
دەژمێرێ
20
شیعر
چوارچێوەکان
تێکدەشکێنێ
سێگۆشەوبازنەکانیش
21
ئینجانە
دیارى باغەبۆ بیابان
22
فەخفورى
فستقى تیا ڕووکەى
جوانە
زەیتوونیش
23
الوالو
ستیانى لیلیسە
24
پیت
پریشکى ڕووبارى وشەیە
25
شێت نیم کەچى
قسەدەبزڕکێنم
26
جوانیت
کەنارییەکى زەردە
دەستگیرناکرێ
27
ماگى
تووتییەکى جوانە
بەڵام غەمگینە
28
ئاگردان
شارێکى ڕازاوەى
بێ دانیشتوانە
29
مەرەکەب
خوێنى قەڵەمە
نووسین
گۆڕیەتى
30
لەشت
مافوورى کاشانە
31
کتلى
کالرنێتێکى هەڵمییە
32
بورکان
شۆڕشێکى شینى شێوەکارییە
33
نەست
شاشەى گرتەى پۆرنۆگرافییە
34
الفاو
بۆردومانێکى هەڕەمەکییە
بە بۆمبى ئاوی
35
هەست
داگیرسانى تەمى ڕەنگاوڕەنگى گیانە
36
تاریکى
ڕووناکییەکى هەڵبزڕکاوى پۆشراوە
37
مۆزەخانە
گۆڕستانێکى ڕۆشنە
38
تاووس
لەبنەڕەتدا
تێکستێکى لیریکییە
39
شینە شاهۆ
لە وشکانیدا
بۆبوونى خۆى دەگرى
40
پەیدابوون
چیرۆکى خۆى بە شەپۆلى هۆش
دەگێڕێتەوە
41
کۆتر
بەگمەى شینى ژیاندۆستە
42
قەل
بە پەڕى ڕەشى
تراژیدیا پەرستە
43
هەمووشتێک
ڕووى شاراوەى
لەمەرگە
جوانیش
44
هیتفۆن
ڕزگارکردنى دەنگە
لە ژاوەژاوى سپى
45
نانەواخانە
دۆزەخى شێوە بەخشینە
بەهەویر
46
نیسک
موورووى ڕۆنى جگەرى نەهەنگە
47
جوانى
بەستەڵەکى هزر دەتوێنێتەوە
48
نیگات ئاگرە
چراى دڵم هەڵدەکا
49
هەنگوین
ڕەنگى چاوى شۆخێکى ئەفسوونکارە
50
پەشمەک
پرچى تەڕو عەترناکى یارە
51
باخوس
لە نۆشینى بادەدا نیشتەجێیە
52
نرسیس
ڕووناکى ئاڵى ڕووخسارە
53
ئاگر
جووڵەى بێپایانى لۆگۆسە
54
سیزیف
هێزى ڕەنگاوڕەنگى بێهودەییە
55
ڕۆژنامە
ماعوونێک چێشتى وشەیە
56
زەمەن
ڕستێک چاوەڕوانییە
57
هەریەکێک لە ئێمە
لەناکاو وندەبێت
58
کتێب
سەندەویژى زمانە
59
شوێن
چرپاى کاتە
60
جوانیت بتڵێک شەرابە
لە گوڵى لوتس
61
شار
چەوى دەریاچەى یادەوەرییە
62
باخچە
تاقیگەى وەرزەکانە
63
خەون
یاری ئەتارییە
64
سیر
قۆپچەى کراسێکە
لە سپێناخ
65
پەرستار
چلچراى شەوانى نەخۆشخانەیە
66
پیاز
جیهانێکە بێناوەڕۆک
67
من
تەمەنێکى دیاریکراوم
68
هێلکە
تۆپى تێنسە
69
دەرمانخانە
دەقێکە تیایدا مەرگ
دواخراوە
70
لەنجەت
بەشێکە
لە
ئەفسوونى ڕووخسارت
71
گازۆ
کرمى زیوینى درزى سینەتە
72
دەشمرم
دەفتەرى جوانیت
پڕنابێ
73
پشکۆ
لەئاگردانى گۆناتەوە
کەوتووە
74
بە نانۆ
ڕاوى مامزى جوانیت دەکەم
75
رێحانەى دەورى کانیلەت
هیتەرە
76
بەهارات
تامى جۆراوجۆرى ماچە
77
کێ
!یارى بە شەترەنجى لەشت دەکا؟
78
یادگە
لەشکرگەى نائاگاییە
79
بوون
دەنکە گوێزێکى پووچەڵە
80
گومان
خوێنى کەسکى داهێنانە
81
شیعر
پێکدادانى ماشێنەکانى زمانە
82
درەوشانەوە
بەریەککەوتنى
عیشق و جوانییە
83
کاسەیەک
کەفى بەستوولە سابوون جوانترە
84
کوارک
چەترێکە لە ئیسفەنجى شیر
85
نەفتالین
هەڵماتێکە لە شەکر
86
تەم
کوتاڵێکى تەنکە
لە دەزووى ڤۆدگا
87
سێکس
لەبنەڕەتدا
خەیاڵێکى شەکەرییە
88
مەستى
خۆشییەکە تێکەڵ
بە تەزووى غەمگینى
89
شیعر
خرۆشاندنى شاوەتى شاراوەى زمانە
90
نانۆ
کۆکتێلێکى ئێستاتیکییە
لە
فینۆمینۆلۆژیا و هێرمنیوتیکا
28/12/2011
