ڕۆژ هەڵەبجەیی
٦-٢-٢٠٢٤
(1)
كه تۆ ئومێدێكی
په‌ژمورده بیت له
دوورییا،
ترپه‌ی دڵم پێخاوس له
پیاده‌دا !
(2)
ئیره‌یی به مانگ ده‌به‌م
مه‌له‌وانی ناو گۆمه،
بۆقه‌كان تریفه‌ی ده‌چڕن !
(3)
مه‌ست بوون هه‌ر باده
نییه ئه‌و كاته مه‌ستم ،
شه‌پۆلی یادی تۆ ده‌كێشم !
(4)
خه‌ییام تا مرد به خه‌یاڵی
شه‌رابه‌وه نووست ،
من تا قیامه‌ت كوشته‌ی
ده‌ستی تۆ !
(5)
ته‌نهایی فێری كردم خۆم
بناسم،
جه‌فایی تۆ ته‌نیاتری كردم !
(6)
ئه‌وه شه‌ونم نییه له‌سه‌ر
ڕومه‌تی گوڵه‌كان ،
كوژانه‌وه‌ی شه‌وه له
ناڵیندا ئه‌شك باران !
(7)
په‌ڕه‌سێلكه‌كان له فڕینا
سێگۆشه‌ن
ئه‌ندازه‌ی ئه‌وانه لاسایی
هه‌ره‌مه‌كان !
(8)
دره‌خت كوا سه‌ما ده‌زانێ ،
ئه‌گه‌ر زیكری (با) نه‌بێ !
(9)
نیشتمانم بۆته جه‌نگی
جه‌نگه‌ڵ ،
لێ هێشتا له پێ
نه‌كه‌وتووم بۆ ژه‌مێك
ئازادیی!
(10)
ڕیشی گیا له سنگی
ده‌شتا باڵه‌فڕ،
ئه‌وه به‌هاره باڵی پێداوه
ببوره ئه‌ی شێوه‌كار !
(11)
ئه‌ی باڵنده‌كانی ناو
قه‌فه‌س به‌س نییه دیلی ؟
وانه‌یه‌ك فێر بن له (با)
په‌نجه‌ره چێده‌كا !
(12)
كێوی توور كه خودای
بینی سووتا،
من هه‌میشه نابینا لێ
دڵم قه‌قنه‌سه له عیشقی
تۆ ئه‌ی خودا !!
(13)
هه‌رگیز نه‌متوانیوه پێت
بڵێم خۆشم ده‌وێی ،
شیعر چ ئیعتیرافێكه له
چاوی دێڕه‌كانما هه‌یت !
(14)
له دڵۆپێك باراندا
قریوه‌ی لافاوێك هاتووه ،
زستان له هه‌نگاوه‌كانیا
ئه‌م دێڕه‌ی جێهێشتووه !
(15)
ته‌رجه‌مه‌ی ژن بۆ
ڕابردوویه‌كی دوور كرا،
ئه‌م دێڕه پیاسه‌ی كرد له
چاو و برۆدا!
