ئەو پەرتووکانەی ژیانیان گۆڕیم:
هزری گەشەسەندن: دەروونناسی نوێی سەرکەوتن
نووسینی: دکتۆر کارۆل دویک
خوێندنەوەی: شێرزاد مامسانی/ نووسەر/ ئیسرائیل
چۆن گۆڕانکارییەکی سادەی بیرکردنەوە دەتوانێت ژیانت بگۆڕێت؟
تا ئێستا هەستت کردووە توانا و لێهاتووییەکانت جێگیرن و ناتوانرێت پەرەیان پێبدرێت؟ ئەگەر وایە، ڕەنگە کاتی ئەوە هاتبێت خوێندنەوەی(هزری گەشەسەندن: دەروونناسی نوێی سەرکەوتن.) لە نووسینی دکتۆر کارۆل دویک. ئەم کتێبە پێشەنگە لە بواری دەروونناسی پاڵنەر و گەشەپێدانی خوود دا تێڕوانینێکی سەرەکی دەدات بۆ ئەوەی کە چۆن بیرکردنەوە کاریگەری لەسەر سەرکەوتن و شکستەکان لە ژیانماندا هەیە.
بیرکردنەوەی جێگیر لە بەرامبەر هزری گەشەسەندن:
کتێبەکە دوو جۆر بیرکردنەوە لەیەکتر جیا دەکاتەوە: هزری جێگیر و هزری گەشەکردن. لە کاتێکدا ئەو کەسانەی کە خاوەن بیرکردنەوەیەکی جێگیرن، پێیان وایە کە زیرەکی و لێهاتووییەکانیان تایبەتمەندییەکی جێگیرن، ئەوانەی بیرکردنەوەی گەشەکردنیان هەیە پێیان وایە کە دەتوانرێت ئەم توانایانە لە ڕێگەی هەوڵدان و کۆڵنەدان پەرەیان پێبدرێت.
وەک دویک دەڵێت: هزری گەشەسەندن لەسەر ئەو باوەڕە دامەزراوە کە توانا سەرەتاییەکانت دەتوانن لە ڕێگەی هەوڵ و کۆڵنەدان گەشە بکەن.
کاریگەری هزر لەسەر کار و پەروەردە:
کتێبەکە نیشان دەدات کە هزری گەشەکردن ڕۆڵێکی سەرەکی دەگێڕێت لە ژینگەی کار و پەروەردەدا. ئەو سەرکردانەی کە هزری گەشەکردن پەیڕەو دەکەن دەتوانن هانی تیمەکانیان بدەن بۆ بەدەستهێنانی باشترین ئەنجام، ئەو مامۆستایانەی کە هانی بیرکردنەوەی گەشەکردن دەدەن بەشداری دەکەن لە دروستکردنی ژینگەیەکی فێرکاری هاندەر و چالاک.
وەک نووسەر لەکتێبەکەیدا دەڵێت: سەرکردەی ڕاستەقینە ئەوانەن کە درک بەوە دەکەن سەرکەوتن پرۆسەیەکی فێربوونی بەردەوامە.
پەیوەندی کەسی و وەرزش:
دویک بۆ ئەو مەبەستە دەڵێت: پەیوەندییە سەرکەوتووەکان ئەو پەیوەندییانەن کە هەردوو لایەن پابەندن بە فێربوون و گەشەکردن دەکەن پێکەوە.
بۆچی پێویستە کتێبی هزری گەشەسەندن: دەروونناسی نوێی سەرکەوتن بخوێنیتەوە؟
-گەشەپێدانی خوود: کتێبەکە باس لەوە دەکات کە چۆن هەر کەسێک دەتوانێت خۆی باشتر بکات بە وەرگرتنی هزر وبیری گەشەکردن.
– پەروەردە: ستراتیژیەت بۆ مامۆستایان دابین دەکات بۆ پاڵنانی فێرخواز بۆ بەدەستهێنانی باشترین ئاستی خۆیان.
– کار: یارمەتی سەرکردە و بەڕێوەبەران دەدات کە ژینگەیەکی کارکردنی دروست بکەن کە هاندەری گەشەپێدان و پێشکەوتنی بەردەوام بێت.
– پەیوەندییەکان: ئامۆژگاری دەدات بۆ باشترکردنی پەیوەندی نێوان کەسەکان بە فێربوون و گەشەکردن پێکەوە.
– وەرزش: نیشان دەدات کە چۆن وەرزشوانان دەتوانن لە ڕێگەی بیرکردنەوەی گەشەکردنەوە ئاستی خۆیان باشتر بکەن.
نووسەر لە ئەزموونەکانی خۆیەوە لە کتێبەکەیدا وەها دەنووسێت:
– کلیلی سەرکەوتن تێگەیشتنە لەوەی کە هەمیشە پێویستە فێر بیت و گەشە بکەیت.
– کاتێک ڕووبەڕووی ئاستەنگەکان دەبیتەوە، بیرکردنەوەی گەشەکردن بانگهێشتت دەکات بۆ ئەوەی وەک دەرفەتێک بۆ فێربوون و باشتربوون بەکاریان بهێنیت.
– هەڵە دەرفەتێکە بۆ فێربوون نەک نیشانەی شکست.
کتێبی (هزری گەشەسەندن: دەروونناسی نوێی سەرکەوتن.) گرنگە، چونکە چەمکی سەرکەوتن و شکست پێناسە دەکاتەوە، هەروەها ئامرازی پراکتیکی بۆ پەرەپێدانی بیرکردنەوەیەک دابین دەکات کە یارمەتیدەرە بۆ بەدەستهێنانی سەرکەوتن لە لایەنە جیاوازەکانی ژیاندا. دەرفەتی خوێندنەوەی ئەم کتێبە لەدەست مەدە کە ڕەنگە ژیانت بۆ باشتر بگۆڕێت.
کارۆل دویک کێیە؟
مامۆستای دەروونناسییە لە زانکۆی ستانفۆرد و بە توێژینەوە پێشەنگەکانی لە بوارەکانی پاڵنەر و گەشەسەندنی دەروونی ناسراوە. لە ساڵی ١٩٤٦ لە شاری نیویۆرک لەدایک بووە و لە تەمەنێکی بچووکەوە حەزێکی زۆری بۆ زانست و پەروەردە هەبووە. بڕوانامەی بەکالۆریۆسی لە کۆلێژی بارنارد بەدەستهێناوە، دواتر دکتۆرای لە دەروونناسی کۆمەڵایەتی لە زانکۆی یێڵ تەواو کردووە.
لە ماوەی ژیانی خوێندنیدا، دویک لە چەندین زانکۆی بەناوبانگدا کاری کردووە، لەوانە زانکۆی کۆڵۆمبیا و زانکۆی هارڤارد، پێش ئەوەی بچێتە زانکۆی ستانفۆرد. توێژینەوەکانی لەسەر ئەوە بووە کە چۆن بیروباوەڕی کەسی کاریگەری لەسەر سەرکەوتن و شکست هەیە، ئەمەش بووە هۆی پەرەسەندنی چەمکی (هزری گەشەسەندوو)
دویک چەندین کتێب و توێژینەوەی زانستی نووسیوە، بەڵام ئەوە کتێبەکەی بوو کە ناوی (Mindset: The New Psychology of Success) بوو کە وای لێکرد ببێتە کەسایەتییەکی ناسراوی نێودەوڵەتی. لەم کتێبەدا، دویک تێڕوانینێکی بەنرخ دەخاتە ڕوو کە چۆن گۆڕانکارییەکی سادە لە بیرکردنەوەدا دەتوانێت کاریگەرییەکی گەورەی لەسەر ئەدای تاکەکان هەبێت لە چەندین بواردا وەک پەروەردە، کار و پەیوەندییە کەسییەکان.
جگە لە کارە ئەکادیمییەکانی، دوێک چەندین خەڵات و ڕێزلێنانی وەرگرتووە بەهۆی بەشداریکردنی لە دەروونناسی و پەروەردەدا. دوێک بەردەوامە لە وانەوتنەوە و وۆرک شۆپ لە سەرانسەری جیهان، یارمەتی تاک و ڕێکخراوەکان دەدات کە هزری گەشەسەندن بگرنەبەر بۆ بەدەستهێنانی توانا راستەقینەکانیان.
